Tarteko Mailako 36. eskola, otsailaren 25 eta 26koa

36.  eskola, otsailaren 25 eta 26koa

-          NOR-NORK iraganean: perpausak osatzeko ariketa, orainaldiko adizkiak iraganean jartzekoa (nahi duenak adizki hauekin perpausak egin eta niri eman diezazkidala tarte bat dudanean zuzentzeko) eta zuzendu beharreko esaldiak zuzendu.

o   Ohartarazi AGURTU aditza NOR-NORK dela, pertsona bat osorik agurtzen delako (nik zu agurtu zaitut > zintudan) baina,  AGUR EGIN edo AGUR ESAN, nor-nori-nork (nik zuri agur egin = agur esan dizut > nizun), KASU EGIN edo JARAMON EGIN bezala (zuk niri kasu egin = jaramon egin didazu > zenidan).

-          MINTZA JOKOA: NOR-NORK IRAGANA: Nik esaldi bat ipini diet arbelean eta ikasleek, ondokoari NORK edo NOR – edo biak – aldaraziz, adizki egokia txertatu behar izan dute esaldian. Ahozko jarduera hau gustura egiten dute eta nahiko ondo. Hurrengoan beste saio bat egitekotan geratu gara.

-          Arratsaldeko taldean, zaletasunekin jarraituz, “Xendazaletasuna edo mendi-ibiliak egitea: ibiltariaren dekalogoa”  ulermen jarduera zuzendu dugu. Luzetxo jo du, testuko hainbat hitz azaldu behar izan baititut. Aipamen berezia merezi izan dute honako esaldiok: “etxolen nahiz aterpeen ateak” eta “landareen nahiz fruituen bilketa”,  NAHIZ hori ez baita kontzesiboa. Lehenik ere agertuak zaizkigun arren, berriz gogorarazteak kalterik ez dielakoan egingo…

-          Hau azaltzeko, Gramatika eta ariketak liburuko 242. orrialdeko E puntua azaldu diet, hots, “nahiz” edo “zein” “eta”ren parekoak izan ohi direla eta perpausa baino osagai txikiagoak (sintagmak...) elkartzeko erabiltzen direla. Aukerakoa izaten dela bakarra erabili ala osagai bakoitzaren aurrean bana ipini, eta bi sintagmak deklina daitezkeela, edo nahi izanez gero, bigarrena bakarrik, lehenengoa mugagabean utzita. Hauen antzeko beste hainbat egitura arbeleratu ditugu.

o   Ana ETA Gloria berandu iritsi dira.

o    (NAHIZ) Ana NAHIZ Gloria berandu iritsi dira.

o   (ZEIN) Ana ZEIN Gloria berandu iritsi dira.

o   HALA Ana, NOLA Gloria berandu iritsi dira.

o   BAI Ana, BAI Gloria berandu iritsi dira.

o   Ana EZ EZIK, Gloria ERE berandu iritsi da (aditza B osagaiarekin komunztatua).

o   EZ BAKARRIK Ana, Gloria ERE berandu iritsi da (aditza B osagaiarekin komunztatua).

-          Arratsaldeko taldean, Pertsonaia ezkutua izeneko jarduera egiten jarraitu dute eta, amaitutakoan, zuzendu egin dugu.

-          Goizeko taldean, Musikaterapia izeneko ulermen jarduera zuzentzen amaitu dutu, astiro, erantzun zuzenak eta okerrak behar bezala argudiatuz eta hainbat ohar eginez.

-          Goizeko taldean, Kantu eta guzti zuzentzen aritu gara (ez dugu amaitu; hurrengoan amaitzekotan geratu gara). Zaletasunen artean musikarekin gabiltza. Lazkaoko apaizari, Koldo Intxaustiri, heavy metal musika gustatzen zaiola esan genuen bere garaian, baina musika anitz dago munduan. Bestelakoa da guztiz abesbatzek edo koruek egiten dutena, lasai eta goxoagoa. Honen harira, “kantu eta guzti” close-testa zuzentzen jardun dugu, beharrezko azalpenak emanez:

o   Alde batetik, testuan ageri diren mugagabe ugariak azpimarrarazi dizkiet ikasleei, mugagabearen erabileraz ohar daitezen:  edozeini, zenbait hiri, hamabost kontzertu, hainbeste hiritan, 29 haur kantarik, 13 orkesta kidek, 2 bakarlarik...

o   GaldetuZ GERO:  testu askotan agertu zaigu jada, baldintzazko hau. “galdeTZEN BADIOGU edo “galdeTUKO BAGENIO”ren parekoa.

o   Kauzako kateatuak: gaztelaniaz ez bezala, euskaraz kausazko bakoitzak eraman behar du bere marka. Ikasleen galdera, denek marka bera eraman behar duten ala ez. Bi aukera: kausazko horiek maila berekoak badira, bai: Aspirina bat hartuko dut, buruko mina BAITut eta hotzikarak BAITitut. Kausazko bat bestearen kausazkoa baldin bada, berriz, hau da, bata bestearen menpe baldin badago, ez: Aspirina bat hartuko dut, buruko mina BAITut, atzo parranda egin nuELAKO.

o   A zein B = A nahiz B = Bai A, bai B = A ez ezik, B ere = A eta B.

(Nahiz) Arantza  nahiz Amaia, atzean eserita daude.

(Zein) Arantza  zein Amaia, atzean eserita daude.

Arantza eta Amaia atzean eserita daude.

Bai Arantza, bai Amaia, atzean eserita daude.

Arantza  ez ezik, Amaiai ere atzean eserita DAGO.

Ez bakarrik Arantza, Amaia ere atzean eserita DAGO.

Lehenengo osagaia, nahi bada deklina daiteke; bigarrena, derrigorrez:

Kopia hauek  Arantza(rentzat) NAHIZ AmaiaRENTZAT  dira.

Kopia hauek Arantza(rentzat)  ZEIN AmaiaRENTZAT dira.

o   Hain dira isilak...ez bait-  Ondoriozkoa. Datorren urtean sakonduko duten arren, azaletik aukera desberdinen berri eman diet

HAIN ikasle azkarra da, azterketan oso emaitza ona lortu du.

HAIN ikasle azkarra da, azterketan oso emaitza ona lortu BAITu.

HAIN ikasle azkarra da, NON azterketan oso emaitza ona lortu BAITu.

HAIN ikasle azkarra da, EZEN azterketan oso emaitza ona lortu BAITu.

HAIN ikasle azkarra da, NON azterketan oso emaitza ona lortu duEN.

HAIN ikasle azkarra da, EZEN azterketan oso emaitza ona lortu duEN.

HAIN ikasle azkarra da, azterketan oso emaitza ona lortu duELA.

 

HAINBESTE diru dauka, nahi duen guztia erosten du.

HAINBESTE diru dauka, nahi duen guztia erosten BAITu.

HAINBESTE diru dauka, NON nahi duen guztia erosten BAITu.

HAINBESTE diru dauka, EZEN nahi duen guztia erosten BAITu.

HAINBESTE diru dauka, NON nahi duen guztia erosten duEN.

HAINBESTE diru dauka, EZEN nahi duen guztia erosten duEN.

HAINBESTE diru dauka, nahi duen guztia erosten duELA.

-          Arratsaldekoekin, AHOZKO ADIERAZPENA. Ziberbikoteak ( bigarren saioa) (30´)  Beste zaletasun bat Interneteko sare sozialetan ibiltzea da, esate baterako, txateatzen. Honen harira, ziberbikoteei eta sare sozialei (watsapp, tweeter, facebook, twentu,…) buruzko testua izan dute mintzagai: horretarako, azpian dituzten puntuak jorratu behar izan dituzte binaka nahiz hirunaka jarrita. Gaiaren gainean jardun dute, euren iritzia emanez.

-          Goizekoekin, AHOZKO ADIERAZPENA: Inauterietako bidaia antolatzen (25´).

-          ETXERAKO LANAK:

o   Goizekoek, “Euskal Inauteria”  izeneko testua osorik irakur dezatela – bertan, Euskal Herriko toki desberdinetako inauterien deskribapena egiten da, beraz, datorren asterako egokia delakoan eman diet - . Osorik irakurri ostean, ikasle bakoitzak zati bat prestatu beharko du gainerako taldekideei ahoz azaltzeko. Neuk adierazi diot bakoitzari zein atal prestatu behar duen.

o   Goizekoei, idazlan bat bidali diet. Inaute-aste horretan gune horietako batera joateko landetxea erreserbatu behar dute internet bidez. Horretarako, 80 hitzeko emaila eskatu diet. Neuk jasotzeko izanen da.

o   Goizekoei, Jon Arretxeren “Ostegunak” irakurliburua irakurtzen has daitezela.

o   Goizekoei,  iraganeko NOR-NORK eta bizidunen deklinabidea uztartzen dituen orrialde osagarria.

o   Goizekoei, beste zaletasun bat bizikletaz ibiltzea da. Honen harira, “Bizikleta etorkizunerako garraiobidea ote?” izeneko cloze-testa.

o   Goizekoei, Jokalari bakartien kluba izeneko ulermen-jarduera, jokozaletasuna gaitzat duena.

o   Goizekoei, gogorarazi kontzesiboen gaiari amaiera emateko, badutela aukerako ariketa bat: 21. orrialdeko 4. ariketa, eurek egin eta zuzentzekoa. Gogorarazi diet esaldi bakoitza kontzesibo modu guztiak erabiliz egitea komeni zaiela eta erantzunak banatu nizkiela. Dena den, ariketa horri buruzko galderak noiznahi egin ahal dizkidatela esan diet, ariketa hori ez baita egun jakin baterako, eurek errepasatzeko baizik.

o   Arratsaldekoei, Extreme izeneko ulermen-jarduera, mendiko bizikletan ibiltzeko zaletasunari buruzkoa. Elkarrizketatik ateratako hainbat esaldi bertan txertatu behar dituzte, soberan dauden bi distraktoreak saihestuta.