Tarteko Mailako 23. eskola, abenduaren 16 eta 17koa

23.      eskola, abenduaren 16 eta 17koa

-  Arratsaldeko taldean: Zehar-estiloa errepasatze aldera izeneko ariketa analitikoa zuzendu, beharrezko azalpenak emanez.

-      Lokailuen ariketa analitikoa (33 esaldi, lokailu egokiekin osa zitzaten) zuzendu dugu astiro, beharrezko azalpenak emanez.

-       211. orrialdeko 3. ariketan (nor-nori erabiliz egin beharreko itzulpenak) zalantzarik izan duten galdetu, eta izan badute, izan dituzten zalantzak  argitu.

-     Itzulpen batean, “axola izan” aditza agertu da. Ikasle baten zalantza honako hau zen: ea ez duen –tzen forma hartzen (“axolatzen”).

Horri erantzunez, zera azaldu behar izan dut. Aditz esapide bat dela, nahi izan, behar izan, ahal izan, ezin izan, balio izan, bizi izan, merezi izan, inporta izan, komeni izan, ari izan… bezalakoa eta, beraz, ez duela –tzen hartzen.

Aditz hauekin denbora desberdinetan ekintzak nola adierazten diren azaldu diet, azken eskutitzean askok ez baitute “izaten” erabili ohiturazko ekintza adierazteko.

Adib. “ herri honetako biztanleek egunero 20 kilometro egin behar IZATEN dituzte ur bila joateko”; Hemen, ura da arazo nagusia. Ibaira joan behar IZATEN dute ur bila”; “Gure Gobernuz Kanpoko Erakundeak lan asko egin behar IZATEN du, eta maitasun handia (asko) eman behar IZATEN diegu hemengo haurrei”; “Komuna behar dudanean, beste txabola batera joan behar IZATEN dut, nire txabola barruan ez baitago komunik”.

·         Ur bila joan behar dut (tengo que ir)

·         Ur bila joan behar izan dut (ekintza amaitua dago, baina gaur: he tenido que ir)

·         Ur bila joan behar izaten dut (normalean, beti, egunero,…: suelo tener que ir)

·         Ur bila joan beharko = behar izango dut (geroaldia: tendré que ir)

·         Ur bila joan behar nuen, baina ez nintzen joan (lehenaldian, ekintza amaitugabea denean edo amaitu zen ala ez ez dakigunean: tenía que ir)

·         Ur bila joan behar izan nuen (lehenaldian, ekintza amaitua: tuve que ir)

·         Ur bila joan behar izaten nuen (lehenaldian, ohiturazko ekintza, behin baino gehiagotan gertatzen zena: solía tener que ir)

·         Ur bila joan beharko = behar izango nuen (iba a tener que ir)

-      IKUS-ENTZUNAREN ULERMENA: Bidaien gaiari buruz ari garenez, “Islandia, hotzean bero” izeneko bideo-pasartea ikusi dugu hiru aldiz. Horretarako, lehenik esaldiak irakurri ditugu. Ikasleek adierazpen horiek egiazkoak diren ala ez erantzun behar izan dute. Ondoren, zuzendu egin dugu, beharrezko azalpenak emanez. Nahi izanez gero, zuzendu ostean, berriz jar dakieki  bideoa, erantzunak egiazta ditzaten eta goza dezaten.

-    NOR-NORK orainaldian: eskema banatu diet eta eskema nola egituratuta dagoen azaldu diet. Horretarako, arbel digitalean eskema jarri dugu eta eskema horren egituraz ohartarazi ditut, hau da, hasieran NOR pertsona markak datozela eta amaieran, berriz, NORK pertsona markak. Jarraian, eskemarekin batera dituzten oharrak azaldu dizkiet, azalpena osatze aldera. Ondoren, Gramatika eta ariketak liburuko 34. orrialdean duten taula ikusarazi diet. Bertan dituzte eskema horrekin atera daitezkeen konbinazio guztiak. Jarraian, eskemaren azpialdean dituzten oharren berri eman diet. Azkenik, bakoitzari konbinazio bat eskatu diot, arbeleko eskema baliatuz, egin dezan. Honela ohartu ahal izan dira, esaterako, HAIEK ZU eta HARK ZUEK konbinazioak berdinak direla eta HAIEK ZUEK adizkiak –tete- duela.

-    Goizeko tadean: AHOZKO ADIERAZPENA (15´): Olentzero eta Olentzeroren baserritik paseotxo bat  testuak laburbildu dizkiote elkarri ahoz.

-          ETXERAKO LANAK:

o  Islandiari buruzko ulermen jarduera, hitz bankuko antolatzaile eta  lokailuekin osatu beharrekoa.

o   NOR-NORK orainaldia: Jonen esaldietan txerta dezatela aditza.

o   Arratsaldeko taldean: Olentzerori buruzko bi testu, mintzarako presta ditzaten: Olentzero eta Olentzeroren baserritik paseotxo bat  testuak.

o   Goizeko taldean: Eguberrietako txostena.