Tarteko Mailako 45. eskola, apirilaren 3 eta 7koa

45.  eskola, apirilaren 3 eta 7koa

-          Bizikletaz ibiltzeko zaletasunekin jarraituz, Extreme  ulermen testua, esaldiak txertatzekoa, zuzendu dugu, astiro, beharrezko azalpenak emanez. Bereziki, honako esapide hauek azaldu dizkiet:

a.       “Ez da giro!” esapidearen esanahi bikoitza: alde batetik, eguraldiari egin diezaioke erreferentzia (Joan den asteburuan Urbasan izan nintzen eta ez zen giro!) ; bestetik, giroari edo ongi / gaizki konpontzeari (Senar-emazteak beti sesiotan, eztabaidan aritzen ziren. Etxe hartan ez zen giro!).

b.      Jendea izena eman ezinik = izena eman ezinda (nola?) gelditu zen; Urbasan, autoa elurretatik atera ezinik = atera ezinda geratu nintzen; Rosa berandu iritsi da, aparkatu ezinik = aparkatu ezinda ibili baita. Goizetan esnatu ezinik = esnatu ezinda ibiltzen naiz.

-          Erlatibozkoa : Esaldiak lotzeko ariketa zuzendu dugu. Horietako esaldi batzuetan, erlatibozkoa NORI kasuan jarri behar izan dute, aditza nor-nori edo nor-nori-nork izanik, nori bat eskatzen zuelako esaldi horretan. Lehen aldiz, NORI kasuan deklinatutako erlatibozkoak agertu zaizkigu. Astiro zuzendu dugu, beharrezko azalpenak emanez eta ikasleei erlatibozkoaren erreferentea deklinatu egin daitekeela ohartaraziz.. Honi ekin aurrtik, gogorarazi diet erlatibozkoa deklinatu egin ahal dela: etorri den mutila Mikel da; etorri den mutilak 20 urte ditu; etorri den mutilari rock musika gustatzen zaio; etorri den mutilarekin afalduko dugu; etorri den mutilarentzat da opari hau; etorri den mutilarengan uste osoa daukat...

-          Arratsaldeko taldean, esku artean dugun eduki gramatikala (erlatibozko perpausak) eta musikazaletasuna uztartzen dituen jarduera bat egin dugu jarraian: “Gure koadrila”. Banaka nahiz binaka egin dute. Bertan, musika zaletasuntzat duten koadrilakideak ageri dira eta ikasleek koadrilakide bakoitzaren taula osatu behar dute. Ulermen jarduera egokia da oso. Bide batez, esaldi horietan ageri diren erlatibozkoak azpimarrarazi dizkiet ikasleei eta erlatibozko horiek NOR ala NORK kasuan dauden galdetu diet, aditz nagusiak duen eraginaz jabetu daitezen. Jarraian, arbelean zuzendu dugu.

-          Goizekoekin, AHOZKO JARDUERA: Erlatibozkoak eta zaletasunak uztartuz, mintza kateatua egiten jarraitu dugu. Horretarako, gogorarazi teorian ikusitakoa, erreferentea kenduz gero, -A(k) determinatzailea gorde behar dugula. Gaurkoan, amaitu egin dugu: zer atsegin duten, zer ez duten atsegin eta zer gorroto edo gorrotatzen duten adieraziz osatu dituzte ikaskideei buruzko erlatibozkoak.

-          Arratsaldeko taldean, ENTZUNAREN ULERMENA. “Azken tabernan”. Erlatibozko deklinatuak langai ditugunez, “Azken Tabernan” izeneko entzungaia jarri diet.  Entzungai honek luze jo duen arren, merezi izan du, erlatibozkoen ordena-dinamika beregana dezaten ikasleek. Lehenik, osorik entzun dugu; ondoren, koadrilako bakoitzari buruzko informazioa entzun dugu lauzpabost aldiz, ikasleek informazio hori jaso eta erlatibo bihur dezaten pertsona hori deskribatu edo definitzeko. Adib.: Nor da Joxe? Baxoerdiak edaten dituENA; edaten ohituta dagoENA; bere itxura estoikoki mantentzen duENA; txapela eta kaikua txukun eta dotore daramatzaNA. Horrela, koadrilako kide guztiekin. Ez dugu amaitzerik izan.

-          Zinemazaletasunarekin jarraituz, Ausartentzat baino ez izeneko cloze-testa zuzendu dugu, Donostiako beldurrezko eta fantasiazko zinemaldiari buruzkoa.

-          AHOZKO ADIERAZPENA : Zinemara joateko plana (2. saioa). Ikasleei fitxa bana eman diet, eta elkarrekintzaren bidez, film  bat ikusteko ados jartzen saiatu behar izan dute (nolako filma ikusiko duten, zein zinema-aretotan, zer ordutako emanaldi edo saiora joango diren, nork erosiko dituen txartelak eta nola, zineman non eseriko diren...). Horretarako, ordea, ikasleei rol kontraesankor batzuk eman edo esleitu dizkiet, zailagoa gerta dakien. Elkarrizketarako, planak adosteko ariketa egokia da oso.  Gaurkoan bikoteak aldatu egin ditut eta luzaroan jardun dugu.

-          ETXERAKO LANAK :

o   Futbolak pasio ala erokeria gehiago eragiten du? Ulermen-jarduera (ulermen galderak eta sinonimoak)

o   Arratsaldekoei, Futbolaren jatorriaren bidetik izeneko jarduera, idatziaren ulermena lantzekoa.

o   Nominalizazioen taula, irakur eta hausnar dezaten.

o   Tristurarik ez eta Alergiari aterperik ez izeneko testuak, biak ere urtaro honetarako aproposak, udaberriko tristurari eta alergiei buruzkoak baitira, irakur ditzatela eta binaka hala adostuta, ahoz kontatzeko presta dezatela.