Tarteko Mailako 42. eskola, martxoaren 25 eta 26koa, Aste Santu aurretikoa

42.  eskola, martxoaren 25 eta 26koa (Aste Santu aurretikoa)

-          Goizeko taldean: ENTZUNAREN ULERMENA: Eguraldi goibela eta psikologia. Ikasleek hiru aldiz entzun dute entzungaia eta hainbat galderari erantzun behar izan diete. Ondoren, zuzendu egin dugu, erantzunak behar bezala argudiatuz. Erantzunak arbel digitalean ipini dizkiet ikasleei.

-          NOR-NORI-NORK lehenaldian. Azalpena egin diet. Horretarako, eskemak banatu   dizkiet, bai orainaldikoa, bai iraganekoa. Orainaldikoaren eta iraganekoaren arteko aldea ikusi dugu eta azaldu diet NORK pertsona-markak aurrera igarotzen direla, aurrean doazela eta, beraz, errazagoa gerta daitekeela iraganeko nor-nork  baino. Eskemaren atzeko aldean, NOR-NORI-NORK faltsuak dituzte. Bere garaian azaldu nituenez, ez dut errepikatu, oso argi daukate eurek irakurtzeko.

-          Jarraian, liburuko 54. orrialdeko azken taulako adizkiak – eskema horretako konbinazioak eginez ateratzen direnak – aztertu ditugu aditzon osaeraz ohar daitezen. 

-       Goizeko taldean: Iraganako NOR-NORI-NORK adizkiak: bi itzuli egin ditugu gela osoan. Ikasle bakoitzari bina konbinazio eskatu dizkiot neuk emandako esaldietan txertatzeko. Ohartu naiz “zuek” eta “haiek” pertsonen –TE- horrekin arazoak dituztela eta baita 2. eta 3. pertsonen hasierekin ere: ZI- / ZEN-.

-        Arratsaldeko taldean: Jonen orriko lehenengo 21 esaldiak egin ditugu ahoz, pertsonak aldaraziz. Luze jo duen arren, merezi izan du nor-nori-nork adizkiak lantzeko.

-      Bizidunen deklinabide kasuak (norengan, norengana, norengandik…). Gramatika eta ariketak I liburuko 195 eta 197. orrialdeetako 1,2,3 eta 4. ariketak zuzendu ditugu, beharrezko azalpenak emanez.

-         Bizidunen deklinabidea: Gramatika eta ariketak liburuko 196. Orrialdeko D puntua, salbuespenak biltzen dituena, azaldu diet, astiro. Hor ikusi ahal izan dute zenbait salbuespen kasutan, izena biziduna izan arren, bizidunen deklinabide kasuak hartzen dituela.

-      Goizeko taldean: AHOZKO ADIERAZPENA: Itxura fisikoa eta itxurakeria. Lehenengo saioa egin dugu, 15-20 minutuz. Hurrengoan jarraitzekotan geratu gara.

LEXIKO LAGUNGARRIA:

            Aurreiritziak: prejuicios

            Aurrez epaitu: prejuzgar

            Utzia edo zabarra: dejado

            Ongi hezia: educado

            Hizkera: hitz egiteko era edo modua

            Lehen(engo) begiratuan: a primera vista

            Handiustea: handia dela uste duen pertsona: creído

-       Arratsaldeko taldean: AHOZKO ADIERAZPENA: Itxura fisikoa eta itxurakeria. Bigarren saioa egin dugu, ordu erdiz.

-      Arratsaldeko taldean: Perpaus kontzesibo osagarrien 3. ariketa zuzendu  dugu  – aditz jokatuekin nahiz partizipioekin – egin beharreko oharrak eginez, hala nola, honako hauek:

a.      Logura naiz = logurak (nola) nago / gose naiz = goseak (nola) nago / hotz naiz = hotzak (nola) nago / bero naiz = beroak (nola ) nago / egarri naiz  = egarriak (nola) nago / beldur naiz = beldurrak edo beldurrez (nola) nago. Alegia, MUGAGABEA + IZAN = -AK + EGON

b.      Gaixotasunekin erabiltzen den egitura hau: GripeAK JOTA dago, dabil / SukarrAK JOTA dago ohean / DepresioAK jota dabil azkenaldian / MalariAK JOTA hiltzen dira Afrikan / Fredy Mercury HIESAK JOTA hil zen / Aitona bihotzekoAK JOTA ingresatu dute / AntsietateAK JOTA nabil horrenbeste lanekin! / (salbuespena) lur JOTA dago, dabil.

c.       Ohartarazi ezezko ordenaz: Anderrek ezer ikusten EZ duen arren...

-          ETXERAKO LANAK:

o   21. orrialde osagarriko 4. ariketa (kontzesiboak). Aukerakoa da, nahi duenak egin eta zuzen dezan. Aholkua: perpaus bakoitza ahalik eta forma desberdin gehien erabiliz egin dezatela. Kontzesiboak lantzeko etxerako izango duten azken ariketa da. Erantzunak banatu dizkiet. Dena den, ariketa horri buruzko galderak noiznahi egin ahal dizkidatela esan diet, ariketa hori ez baita egun jakin baterako, eurek errepasatzeko baizik.

o   Opor egunak lasai igarotzeko aukera deritzon cloze-testa,  bainuetxeei buruzkoa.

o   Bizidunen deklinabidea: Gramatika eta ariketak I  liburuko 197. orrialdeko 5. eta 6. ariketak.

o   Nor-nori-nork txostena: Iraganeko NOR-NORI-NORK adizkiak lantzeko txostena, erantzun eta guzti (lehenengoa salbu, hau klasean zuzentzeko baita, elkarrizketak dakarren pertsona aldaketak suposa dezakeen zailtasuna dela-eta).

o   Aste Santurako hotela erreserbatzeko emaila.

o   Errepaso txostena.