B2.2 mailako 9. eskola, 2022ko urriaren 26 eta 27koa

 

9. eskola: 2022ko urriaren 26 eta 27koa

-         Bi taldeetan: Erlatibozkoak 2 zuzentzen aritu gara arbel digitalean, astiro, beharrezko azalpenak emanez, ezezkoen ordena eta erlatibozkoak  bere ondokoa edo erreferentea galdu ostean hartu beharreko kasu marka gogoraraziz, beti ere, aditz nagusiari erreparatuta. Oharrak:

·   Ez nahastu SINESKORRA eta SINESGARRIA: Sineskorra: edozer sinesten duen persona / Sinesgarria: sines daitekeen zerbait.

·    Ziria sartu: engainatu. Adib.: Gaur saltzaile bat etorri zait etxera eta ZIRIA SARTU DIT = engainatu egin NAU (Nor-nork) ). Niri ZIRIA SARTU nahian baldin bazabiltza, JAI DAUKAZU (=ez daukazu zereginik), HORTZAK EDERKI BERDINDUAK DITUT nik eta!

·  Bitxia iruditu arren, MEREZI IZAN aditza jokatzean UKAN hartu arren (merezi DU), nominalizazioak ez du ZERK kasurik hartzen. “Merezi du ikusTEA, joaTEA, egiTEA,…” (ikusTEAK, joaTEAK, egiTEAK…)

·         Aho zabalik = harrituta = harriturik = txundituta  = txunditurik = ahoa bete hortz = harri eta zur = zur eta lur geratu naiz

·         Zerraldo erori: luze-luze erori. “caerse redondo”

·     Kontuz. “txantxetan + ARITU” edo “txantxetan + IBILI” (baina ez kalkatu gaztelaniatik “estar bromeando” > “txantxetan EGON”.

-     Bi taldeetan: Gogorarazi diet erlatibozko perpausak aposizioan ere egin daitezkeela. Horretarako, liburuko 41. gaira jo dugu (157. orrialdeko C atala) eta nik banatutako txosteneko adibideei arretaz erreparatu diegu. Ikasleei  batzuek egiten duten akats baten berri eman diet. Izan ere, badira zenbait ikasle, erlatibozkoa aposizioan erabiltzen dutenean, -(e)NA(K) erabili beharrean, -(e)LA konpletiboa sartzen dutenak. Adibide batzuk jarri dizkiet arbelean. Bertan ikusi ahal izan dute esaldi bera bi modutan: erlatibozko tradizionala erabiliz (-(e)N + ondokoa edo erreferentea) eta aposizio-erlatiboa erabiliz (hau da, erreferentea aurreratuz).

-         
Oraindik etorkinei errezeloz begiratzen diEN jende asko dago.

-          = Oraindik jende asko dago, etorkinei errezeloz begiratzen diENA (diela).

-        
Telebistan badaude ezertarako balio ez dutEN eta hutsaren hurrengoak dirEN makina bat programa.

-   = Telebistan badaude makina bat programa, ezertarako balio ez dutENAK (dutela) eta hutsaren hurrengoak dirENAK (direla).

-          Gela honetan jatorriz nafarra dEN ikasle bat dago.

-      = Gela honetan badago ikasle bat, jatorriz nafarra dENA (dela).

-          Errealak Munichetik datorrEN jokalari berri bat fitxatu du.

-    = Errealak jokalari berri bat fitxatu du, Munichetik datorrENA (datorrela).

Behin eta berriz azpimarratu diet ez dituztela nahastu behar  –(e)LA konpletiboa eta –(e)NA erlatibozkoa. Bereizketa argi gera dakien, orri osagarria banatu eta bertako azalpenak nahiz adibideak irakurri ditugu.

-   Bi taldeetan: Galderak beste Donostia horretara izeneko lexiko-jarduera, testua bertatik ateratako 22 hitzekin osatzekoa – 6 distraktoreak saihestuz – zuzendu dugu, astiro, testuaren ideia nagusiak argiago adieraziz. Hau ongi etorri zaie gaur bidali diedan ulemen zehatzeko jarduera errazago egiteko.                      

-      Bi taldeetan: ENTZUNAREN ULERMENA: Etxebizitza turistikoak (x1). Zuzendu berri dugun testuan zera irakurri ahal izan dugu, Donostiako udalak onartu duela – hitzez, behintzat – turismoa mugatu beharra dagoela, hots, turismoaren hazkundeak nolabaiteko muga ezarri beharra dagoela; muga-neurri bat izan liteke, esaterako, etxebizitza turistikoak arautzea. Horren gaineko entzungaia jarri diet. Itemak eta hauen ohar lexikoak – atzean kopiatu dizkiet – azaldu ondoren, bitan entzun dugu entzungaia eta ondoren, hirugarren entzunaldia egin ahala, zuzendu egin dugu, erantzun zuzenak behar bezala arrazoituz. Berriz entzun nahi izanez gero, ikasleek blogean izango dute entzungai.  Lexiko lagungarria:

- “Jarduera-baimena”: zeregin horretan jarduteko edo aritzeko baimena. Adibidez, landetxe bat, taberna bat…zabaltzeko beharrezkoa dena. Udalari edo Diputazioari eskatzen zaio normalean.

- “Urratu”: legeari dagokionean, legea ez betetzea esan nahi du, legea “haustea” (“infringir”). Gauza bera eskubideekin:    giza eskubideak urratu: giza eskubideak ez bete (“vulnerar”).

- “Indarrean jarri /egon / jarraitu”: Lege munduan erabiltzen da (legea, araua, araudia, neurria…): “poner /estar en vigor”. Indarrean jarri dute abortuaren aurkako lege berria. Indarrean dagoen araudiaren arabera, debekatuta dago eskolan erretzea. Koronabirusari aurre egiteko neurri zorrotzak jarri zituen indarrean Gobernuak; egun, neurri horietako askok ez dute jarraitzen indarrean.

-  “Bere horretan + utzi / geratu / egon…”: lehen zegoen bezala, ukitu gabe, inongo aldaketarik egin gabe. Aurten etxeko horma guztiak margotu ditugu, nire logelakoa izan ezik; nire logelakoa bere horretan utzi dugu.

- “Begi onez ikusten du”: ongi iruditzen zaio /“Ez du begi onez ikusten“ (begi txarrez ikusi).

- “Ustiatu” (“explotar”): Zerbaiti (negozio bati, meategiari, lursail bati…) etekin edo probetxu ekonomikoa ateratzea.

UstiaTEGIa: “explotación”. Adib. “nekazaritza-ustiategia”.

UstiaPENa edo ustiaKETA: “explotación”. Adib. “Baliabide naturalen ustiapena egin zuten errusiarrek Islandian”: “Petrolioaren ustiaketak jende asko aberastu du Dallasen”.

- “-(e)LAKOAN + egon”: gogoratu egitura honek ustea edo iritzia adierazten duela: legezkoak dirELA uste du. Altzoko Handiari buruzko berridazketetan azaldu genuen.

A erabilera):

Gaur nik liburua klasera ekarri dut, erabiliko duguLAKOAN = erabiliko duguLAKO USTEAN = erabiliko duguLA PENTSATUZ.

Maila honetan matrikulatu gara, aurten asko ikasiko duguLAKOAN = ikasiko duguLAKO USTEAN = ikasiko duguLA PENTSATUZ.

B erabilera):

Bihar eguraldi ona egingo duELAKOAN NAGO = egingo duELA USTE DUT.

Ikasle hauek oso jatorrak dirELAKOAN NAGO = dirELA USTE DUT.

Datorren igandeko manifestazioan istiluak sortuko dirELAKOAN NAGO = sortuko dirELA USTE DUT.

Asier jarduera-baimena duten pisu guztiak legezkoak dirELAKOAN DAGO = dirELA USTE DU Asierrek.

- ZERK + “Behera egin” / “Gora egin”: Bihar tenperaturek (zerk) behera egingo dute / gora egingo dute = Bihar tenperaturak (zer) jaitsiko dira / igoko dira. Langabetuen kopuruak (zerk) behera egiten du uda sasoian (uda garaian), baina udazkenean, berriz gora egiten du = Langabetuen kopurua (zer) jaitsi egiten da…igo egiten da.

-   Arratsaldeko taldean: AHOZKO ADIERAZPENA: Turismoa erakarri, kosta ahala kosta? Ikasleek honako balizko egoera hau hautatu dute.

Demagun[1] Hondarribiko  hondartzan luxuzko hotel bat eraiki nahi duela Hilton kateak (talasoterapia, bezeroentzako kai propioa, palmondoz eta hainbat espezie exotikoz betetako lorategiak,  hondartzan etzaulki nahiz eguzkitakoak…eta guzti).

Ondoren, bi talde osatu ditugu: Batean, proiektua gauzatzearen aldekoak (enpresa sustatzaileko zuzendaritza taldea) eta, bestean, proiektua gaitzesten[2] dutenak, IHEIEko (Ingurumenaren aldeko Herritar Ekologista Iraultzaileen Elkartea) kideak. Ikasleek euren artean eztabaidatu behar izan dute proiektua gauzatzeak nolako ondorioak izan litzakeen herrian eta inguruan (zarata, zikinkeria, prezioen igoera, bertako biztanleen bizi-kalitatearen aldaketa, paisaia eta natura, garraio zerbitzuak, lanpostuen sorrera eta hauen kalitatea, bezeroen / jabeen diru-ekarpena herriko ostatu nahiz dendetan…), euren iritziak behar bezala argudiatuz. Irakasleak alkatearena egin du eta berari dagokio enpresa sustatzaile-eraikitzaileari jarduera-baimena eman ala ez erabakitzea.

-    Goizeko taldean: Lehenengo idazlanak – eskabide gutuna – banatu eta zuzenketa irizpideak azaldu dizkiet. Halaber, gutun formalen egitura gogorarazi diet (blogean dute genially bidez egindako papiro bat) eta egin dituzten akats batzuen berri eman diet.

-          ETXERAKO LANAK:

-          Bi taldeetan: Aposizioan dauden erlatibozko perpausak lantzeko fitxa (35. zk. duena: Badago bat,…handia dENA).

-       Bi taldeetan: Idazlana: Pisu turistikoa. Zinegotziarentzako e-posta, jabeari jarduera baimena uka diezaion.

-        Bi taldeetan: Galderak beste Donostia horretara izeneko ulermen-jarduera. Gaurko azalpenaren ostean testua ulergarriagoa egingo zaielakoan, ulermen jarduera honetan aukera zuzena egin behar dute.

-      Bi taldeetan: AUKERAKO JARDURA (Idatziaren ulermena): 1. gaian, identifikazio pertsonalaz ari gara. Euskaldunon alderdi fisikoa ez ezik, izaere ere azter dezagun. “Hain serioak al gara euskaldunok?” izeneko ulermen jarduera egin dezakezue. Bertan, testutik ateratako hainbat esaldi txertatu behar dituzue hutsune egokietan. Ebazpena (=erantzun orria) blogean izango dute.

-          Goizeko taldean: Hemen dugu Halloween ate-joka izeneko ulermen jarduera. Izan ere, datorren astelehenean izango dugu azaroaren 1a, Santu Guztien Eguna eta bezpera, Gau Beltza.

-          Goizeko taldean: Tradizioa nagusi izeneko testua irakur dezatela. Bertan, Euskal Herriko hileta ohituren berri ematen da. Ohitura eta usadio bitxiak ezagutuko dituzte testu honetan.

-          Egina ez badute, Ez dut azkoitiarra ematen izeneko ulermen-jarduera.

-      Egina ez badute, Perretxikotara joateko garai berriak izeneko cloze-testa egiteko eta zuzentzeko aholkatu. Azalpenak ulertzen ez badituzte, zalantzak edonoiz galde diezazkidakete eta argituko dizkiet.

---

[1] Demagun = suposa dezagun…

[2] Gaitzetsi: txartzat eman edo txartzat jo, ez onartu.

B2.2 maila: Erlatibozkoak 2. EBAZPENA

B2.2 maila: Erlatibozko perpausak. 41. gaia (erlatibozkoa aposizioan edo azalpen gisa)

B2.2 maila: Erlatibozko perpausen azalpenerako txosten gehigarria

B2.2 maila: Hain serioak al gara euskaldunok? (AUKERAKO JARDUERA)

B2.2 maila: Hain serioak al gara euskaldunok? EBAZPENA

B2.2 maila: Galderak beste Donostia horretara (lexiko-zakua). EBAZPENA

B2.2 maila: Galderak beste Donostia horretara (ulermen jarduera).

B2.2 maila: Etxebizitza turistikoak

B2.2 maila: Etxebizitza turistikoak

B2.2 maila: Etxebizitza turistikoak. Lexiko lagungarria

B2.2 maila: Etxebizitza turistikoak. EBAZPENA

B2.2 maila: Eskaera gutun edo e-mail formalen egitura

B2.2 maila: Gure atarian, pisu turistikorik ez!

B2.2 maila (GOIZEKOAK): Tradizioa nagusi: Euskal Herriko zenbait hileta ohitura bitxi eta, askorentzat, ezezagun

B2.2 maila (GOIZEKOAK): Hemen dugu Halloween (Gau Beltza) ate-joka!

 

B2.2 mailako 8. eskola, 2022ko urriaren 24 eta 25ekoa

 

8.      eskola: 2022ko urriaren 24 eta 25ekoa 

-      ENTZUNAREN ULERMENA: Udazken koloretan: hostoak orbel bihurtzen diren urtaroa (x0.9). Itemak azaldu ostean, birritan entzun dugu entzungaia eta, ondoren, zuzendu egin dugu, beharrezko azalpenak emanez. Oharrak:

o   Mugagabea + bihurtu = bilakatu: “ikuskizun_ bilakatzen da” eta ez “ikuskizun batean bilakatzen da” (“se convierte en un espectáculo”ren kalkoa)

o   Gai izan = gauza izan + -T(z)EKO. Ni gai naiz = ni gauza naiz ingelesez jariotasun handiz hitz egiteko.

o   Urtaro: Urte + aro. Urtaroa = urte-sasoia = urte-garaia. “Aro” hitza duen hitz konposatu gehiago ere badira euskaraz: haurtzaro, Erdi Aro, gaztaro, izotz-aro… 

o   Hostoa / orbela: “Orbela” da zuhaitzetatik eroritako hosto ihartuen multzoa.  

-   Beldurrik gabe hartu behar dugu turismoa. Altzoko alkateari Altzoko Handiaren gainean egindako elkarrizketarekin osatutako cloze-testa zuzendu dugu, beharrezko azalpenak emanez. Ikasleei ohar horiek biltzen dituen orria banatu diet, kopiatzen aritu beharrik ez izateko. Jarduera zuzendu ahala, ohar horiei egin diet erreferentzia, azalpenak emateko.

1.      NORENA + EGIN: paper, rol edo funtzio hori egitea esan nahi du. TontoARENA egin arren, oso mutil azkarra da Mikel. Ikasle horrek txuleta bat daukan arren, irakasleak ez ikusiARENA egin du, bere ikasle kuttuna baita. Pedro Sanchezi dimisioa emateko eskatzen badiote ere, berak ez entzunARENA egiten du. Zure haurra beti ari da pailazoARENA egiten. Eguberrietako antzezlanean, nik San JoseRENA egingo dut; zuk, berriz, JexuxitoRENA.

2. MUGAGABEA + IZENDATU: Aditz berezi hauekin bigarren objektua (zer edo nor) mugagabean deklinatzen da: Bihurtu = bilakatu, aukeratu = hautatu, izendatu, sartu, bidali, joan, kontratatu, hartu... Aditz hauek bi NOR  edo ZER eramaten dituzte eta bigarrena mugagabean agertzen da.

-          Musu eman zionean, igela (1. nor) printze (2. nor edo zer) bihurtu zen (printzea, printzean, printze batean bihurtu zen).

-          Eraikin hori (1. zer) ostatu (2. zer) bihurtzea erabaki du udalak (ostatua, ostatuan, ostatu batean bihurtzea)

-          Mutil hori (1. nor) morroi (2. nor edo zer) joan da Alkizako baserri batera (morroi bezala joan da).

-          Mikel (1. nor) alkate (2. nor edo zer) izendatu dute (alkatea).

-          Neska hau (1. nor) gelako ordezkari (2. nor edo zer) aukeratu dute (ordezkaria).

-          Gure osaba (1. nor) fraile (2. nor edo zer) sartu da Arantzazun (frailea)

-          Zuen etxean neska ekuadortar bat (1. nor) hartu duzue neskame (2. nor edo zer) (neskame bezala hartu duzue).

3. ALDEZ EDO MOLDEZ = NOLA EDO HALA = NOLA HALA: “ modu batera edo bestera” adierazten du. Ikasturte hau gogorra den arren, gainditu behar dut aldez edo moldez.

4. –TZEKO + ASMOA (nominalizazioa).

5. NORI edo ZERI + AURRE EGIN: “kontra egitea, aurka egitea” esan nahi du. Irakasleak leihoa ireki du beroARI AURRE EGITEKO. Arazoak baldin badituzu, arazoEI AURRE EGIN behar diezu, negar egin beharrean. Zailtasun asko topatu zituen bere bidaian, baina AURRE EGIN zien zailtasun guztiEI.  

6. HAINBAT + MUGAGABEA: “asko” edo “ugari”ren sinonimoa da “hainbat”. Mugagabean deklinatzen da edota ondoko izena mugagabean deklinatzera behartzen du: Hainbat_ (lagun_) bildu da asteburu honetan Bartzelonako kaleetan.

7. ZEIN = NAHIZ. Bi osagai edo gehiago elkartzeko balio dute. “nahiz” edo “zein” “eta”ren parekoak izan ohi dira eta perpausa baino osagai txikiagoak (sintagmak...) elkartzeko erabiltzen dira.

Gaur Errenteriako jaiak hasi dira ETA udalak jarduerak ETA = NAHIZ = ZEIN   ospakizunak antolatu ditu.

Goizean Adarra mendiaren gailurrera igo gara ETA han galletak ETA = NAHIZ = ZEIN ogi-tartekoak jan ditugu hamaiketakotan.

Aukerakoa izaten da bakarra erabili ala osagai bakoitzaren aurrean bana ipini, eta bi sintagmak deklina daitezke, edo nahi izanez gero, bigarrena bakarrik, lehenengoa mugagabean utzita: Horrek izugarrizko gabezia eragin zuen (ZEIN) herritarrengan ZEIN bisitariengan = herritar_ ZEIN bisitariengan.

Esaldiok parekoak lirateke:

                                                              i.      Ana ETA Gloria berandu iritsi dira.

                                                            ii.       (NAHIZ) Ana NAHIZ Gloria berandu iritsi dira.

                                                          iii.      (ZEIN) Ana ZEIN Gloria berandu iritsi dira.

                                                          iv.      HALA Ana, NOLA Gloria berandu iritsi dira.

                                                            v.      BAI Ana, BAI Gloria berandu iritsi dira.

                                             vi.      Ana EZ EZIK, Gloria ERE berandu iritsi da (aditza B osagaiarekin komunztatua).

                                                        vii.      EZ BAKARRIK Ana, Gloria ERE berandu iritsi da (aditza B osagaiarekin komunztatua).

8. LEXIKOA: IKA-MIKA (riña, enfado, disputa) = EZTABAIDA (discusión, polémica, debate) = LISKARRA (discusión, disputa) = TIRABIRA (altercado, discusión, disputa) = SESIOA (discusión, disputa) = KALAPITA (alboroto, discusión, disputa)

ADOSTASUNA = AKORDIOA = HITZARMENA

DEIGARRIA = ERAKARGARRIA

ALDENDU = URRUNDU

Kultura ARLOA = ALORRA = ESPARRUA = EREMUA = SAILA

9. DATORRENAK (erlatibozkoa nork kasuan) < datorrEN bisitariAK. Pluralean: datozEN bisitariEK > datozENEK).

10. BA- …ERE: Egitura kontzesiboa da. Asteasuko Muskerraren Bidea gogora ekar BAdezake ERE = gogora ekar dezakeEN ARREN = NAHIZ ETA Asteasuko Muskerraren Bidea gogora ekar dezakeEN… Oso irakasle zorrotza BAda ERE, gustura nago berarekin = oso irakasle zorrotza dEN ARREN, gustura nago berarekin.

- AHOZKO ADIERAZPENA (30´): Turismoa mugatu behar al litzateke? Turismoa, mesederako ala kalterako? .“Handia” filma estreinatu zenetik, asko eta asko dira Altzo herria eta Altzoko Handiaren urratsak (=pausoak) ezagutzera bertara hurbildu diren eta hurbiltzen diren kanpotar nahiz turistak. Altzoko alkateak ondare[1] kultural horri etekina edo probetxua atera nahian, turismo plan bat jarri du abian (=martxan). Helburua, Altzo ezagutaraztea eta turismoa erakartzea (turismoa diru-iturri ere bai baita). Film baten arrakastak Zumaian ere sekulako (=izugarrizko) eragina izan zuen: turista saldoa (=oldea, andana, mordoa) erakarri zuten Ocho apellidos vascos eta Game of Thrones fenomenoek. Batzuen gusturako, jende gehiegi. Kontua zera da:

Turismo horrek kolokan (=galtzeko arriskuan) jar ote ditzake gure nortasuna eta geure geureak diren ohiturak? Eta, beraz, turismoa mugatu behar ote litzateke?

-         
Ezagutzen al duzue turismoak aldaketak eragin dizkion herri edo hiriren bat? Zein aldaketa jasan ditu turismoa dela-eta?

-     Zure herri edo hirian ere turismoak gora egin du? Ondorioak onerako (= mesederako) ala txarrerako izan dira / izan litezke?

-          Turismoak zer alderdi on edo onura dakartza? Zer arazo edo alderdi txar?

-    Gure izaera, nortasuna, paisaia, ohiturak edo usadioak…arriskuan edo agian, galtzear (=galtzeko zorian, galtzeko arriskuan)[2] egon litezke turistengatik?

-       Turista kopurua mugatzeko neurriak hartu beharko lirateke? Turista kopurua mugatu beharko litzateke? Neurri horietako bat izan liteke Donostian egin duten bezala, pisu turistikoak arautzea[3]? Gune naturaletan (Urederran, Gaztelugatxen, Dubrovnicen, Alhambran…) turismoa mugatzea, hau da, eguneko bisitari kopuru jakin edo zehatz bat hartzea zer iruditzen zaizue?  

-  Goizeko taldean: Ahozkotasuna antzearen garrantzia. Yolanda Olasagarreri egindako elkarrizketa-testutik hamar esaldi atera nituen, ikasleek berridatz zitzaten, nik emandako lexiko nahiz gramatika egitura erabiliz. Talde honetan, etxerako bidali ez nuenez, klasean bertan jarduten dugu egiten. Egin genuen azkena 8.a izan zen eta bertan, baiezko baldintzak egiteko “komodina” agertu zitzaigun: PARTIZIPIOA + -(e)Z GEROZ. Gaurkoan honen azalpena egin eta   –(e)NEZ (GERO) kausazkoarekiko aldea azaldu diet.

-          PARTIZIPIOA + -(E)Z GERO

-(e)Z GERO  baiezko baldintza egiteko “komodina” da. Hiru baldintzetarako (erreala, alegiazkoa edo hipotetikoa, irreala edo iraganekoa) balio du eta oso erabilerraza da: partizipioari gehitzea nahikoa da, ez darama aditz jokaturik.        EZEAN = EZIK partikulen baiezko bertsioa da.

- Baldintza erreala: Gurera (=gure etxera) etortzen BAzara, elkarrekin bazkalduko dugu, aspaldiko partez. = Gurera etorriZ GERO, elkarrekin bazkalduko dugu, aspaldiko partez.

- Alegiazko baldintza edo hipotetikoa: Datorren igandean gurera etorriko BAzina, elkarrekin bazkalduko genuke, aspaldiko partez.  = Datorren igandean gurera etorriZ GERO, elkarrekin bazkalduko genuke, aspaldiko partez.

- Baldintza irreala edo lehenaldikoa: Joan den igandean gurera etorri (izan) BAzina, elkarrekin bazkalduko genu(ke)en = Joan den igandean gurera etorriZ GERO, elkarrekin bazkalduko genu(ke)en, baina nahiago izan zenuen jatetxe hartara joan.

 

- Euria eginEZ GERO, etxean geratuko gara (= euria egiten badu) (baldintza erreala).

- Euria eginEZ GERO, etxean geratuko ginateke (= euria egingo balu) (alegiazko baldintza edo hipotetikoa).

- Euria eginEZ GERO, etxean geratuko ginen = ginatekeen (=euria egin (izan) balu) (baldintza irreala edo lehenaldikoa), baina ateri zegoenez, paseotxo bat ematera irten gara zakurrarekin.

- Arazoren bat sortuZ GERO, deitudazu lehenbailehen, hitzordua bertan behera uzteko (=arazoren bat sortzen bazaizu) (baldintza erreala).

- Zalantzaren bat edukiZ GERO, galdedazue (=zalantzaren bat baldin badaukazue) (baldintza erreala).

- Jo eta ke  ikasiZ GERO, azterketa gaindituko dut (=jo eta ke ikasten badut…) (baldintza erreala).

 

 Baina KONTUZ!!!!! EZ NAHASTU HONEKIN:

 

(ADITZ JOKATUA + -(e)NEZ GERO): KAUSAZKOA

- Euria gogotik egin duENEZ (GERO), urtegiak gainezka daude (=euria gogotik egin duelako).

- Lan handia izan duzuNEZ (GERO), ezin izan zara etorri festara (=lan handia izan duzulako).

- Negu gorria igarotzen ari garENEZ (GERO), uda heltzeko irrikan nago (=negu gorria igarotzen ari garelako).

- Zalantza asko ditudaNEZ (GERO), hitzordua eskatuko diot Dabidi tutoretza-saio baterako (=zalantza asko ditudalako).

- Jo eta ke ikasi dudaNEZ (GERO), azterketa gainditu dut (=asko ikasi dudalako).

-          ETXERAKO LANAK:

o   Galderak beste Donostia horretara deritzon jarduera, testua, bertatik ateratako 22 hitzekin osatzekoa.

o   Ez dut azkoitiarra ematen izeneko ulermen-jarduera (astebururako gorde dezakete, ez baitugu hurrengo egunean zuzenduko).

o   EKARRI! Erlatibozkoak 2.

---

[1] Ondare: “patrimonio”

[2] Gogoan izan: galTZEAR = galTZEKOTAN = galTZEKO ZORIAN = galTZEKO ARRISKUAN (gutxi falta da galtzeko)

[3] Arautu: arauak jarri: “regular”