Tarteko Mailako 52. eskola, maiatzaren 13 eta 14koa

52.  eskola, maiatzaren 13 eta 14koa

-          Nominalizazioak lantzeko orrialdeetan (269, 267, 200, 197. orrialde osagarriak) zalantzarik baduten galdetu eta, zalantzarik izanez gero, argitu.

-     BALDINTZA HIPOTETIKOA. Etxerako zituzten lehenengo itzulpenak eta hutsuneak zuzendu ditugu, astiro, arbel digitalean, baldintza nahiz ondorioko adizki horiek iraganetik nola sortu diren azalduz. Luze jo duen arren, lehen ariketak izaki, merezi izan du denbora honetan pasatzea.

-     Maite Zabalari egindako elkarrizketa osatzeko ariketa banatu ostean, ikasleei denbora utzi diet, banaka nahiz binaka, hutsune horiek osa zitzaten – bertan, adizki hipotetikoak eta zenbait nominalizazio txertatu behar zituzten – eta amaitu ostean, antzeztu egin dugu. Baliagarria gertatu zaie, adizki hipotetiko ezagunenak (nintzateke, nuke...) ezagutzeko eta eurenganatzeko.

-          Gogorarazi diet –(e)Z gero baldintzazkoa – ikasturte hasieratik makina bat aldiz agertu zaiguna – komodin baten modukoa dela eta hiru baldintzak egiteko erabil daitekeela, partizipioari erantsita: PART. + -(e)Z GERO

-          Euria egiten badu, busti egingo naiz (si llueve… me mojaré)

-          Euria eginEZ GERO, busti egingo naiz (ERREALA)

-          Euria egingo balu, busti egingo nintzateke (si lloviera o lloviese… me mojaría)

-          Euria eginEZ GERO, busti egingo nintzateke (HIPOTETIKOA).

-          Euria egin_ (izan) balu, busti egingo nintzen (si hubiera o hubiese llovido… me habría mojado)

-          Euria eginEZ GERO, busti egingo nintzen = nintzatekeen (IRREALA).

-          Ingurumenaren gaiari jarraiki, ingurumenarekin duen zerikusiagatik, “Mendian gora” izeneko ulermen jarduera zuzendu dugu, astiro, beharrezko azalpenak emanez.

-          Udatik negura igaro (= pasa(tu)) AHALA = Udatik negura igarotzen (= pasatzen) garEN NEURRIAN = garEN HEINEAN,…

Ikasturtea aurrera joan (part.) AHALA, gero eta kopia gehiago dauzkagu = Ikasturtea aurrera doaN NEURRIAN = doaN HEINEAN, gero eta kopia gehiago dauzkagu.

-          Mugikorra ALDEAN (gainean) DARAMAT; giltzak ALDEAN (gainean) dauzkazu = daramatzazu?

-      ENTZUNAREN ULERMENA “Mendian ez galtzeko ikastaroa”. Entzungaia entzun dugu bizpahiru aldiz. Izan ere, mendizaletasuna – xendazaletasuna bezalaxe – zaletasun bat da, euskaldunon artean oso zabaldua dagoena. Entzungai honek, gaia – mendizaletasuna – eta eduki gramatikala – nominalizazioak – uztartzeko aukera ematen duenez, entzungai egokia delakoan nago. Ikasleek hirutan entzun dute eta entzungai honetako ideia nagusiak jaso behar izan dituzte eskema moduan, gero binaka jarri eta elkarrekin hitz eginez elkarri informazioa trukatzeko.

-          AHOZKO ADIERAZPENA: “Mendian ez galtzeko ikastaroa”. Lehenik, bikotekide batek; gero, besteak. Binaka jarrita, bikote bakoitzeko ikasle batek jasotako puntuen berri eman dio bere bikotekideari (entzungaia laburbildu, mendira joateko aholkuen berri elkarri emanez). Honek bestearen azalpena osatu, zabaldu nahiz zuzendu egin du. Ondoren, alderantziz egin dute. Halaber, esan diet euren mintzaldian errepara diezaietela entzungaian ageri diren nominalizazioei (komenigarria da...-tzea, komeni da...-tzea, hobe da... –tzea, -tzen saiatu behar da,…-tzeko aholkatzen edo gomendatzen du,...) eta, esaldi laburrak eginagatik, nominalizazioak zuzen erabil ditzatela.

-          Amaitzeko, neuk banatu diet ideia nagusien orria, irakur eta egiazta dezaten zenbateraino jaso duten informazio hori.

-          Goizeko taldean: ingurumenari buruzko 8. ariketa zuzentzen hasi gara, baina ez dugu amaitzerik izan: Bertan gogorarazi diet:

o   EZ DAGO sua pizTERIK  = ezin da sua piztu = ez / ezin daiteke sua piz(tu)

EZ ZEGOEN sua pizTERIK = ezin zen sua piztu.

EZ DAGO paperik lurrera botaTZERIK = ezin da = ezin daiteke paperik lurrera bota

EZ DAGO gelan erreTZERIK / BADAGO kafea edaTEA.

Badago hor aparkaTZERIK? Ez, ez dago hor aparkaTZERIK / Bai, badago hor aparkaTZEA.

o   -tzeaz + ARDURATU. Adibidez, gelako festarako, X arduratuko da edariak erosTEAZ; y arduratuko da tortilla egiTEAZ; Z arduratuko da musika ekarTZEAZ…

-          ETXERAKO LANAK:

o   Nominalizazioak lantzeko ariketak, erantzun eta guzti, 18. ariketa salbu (gelan zuzenduko dugu).

o   Goizekoei: :  BADAGO TZEA / EZ DAGO TZERIK lantzeko berariaz prestatutako ariketa.

o   Gramatika eta ariketak I liburuko 71. orrialdeko 2. ariketa eta 73. orrialdeko 4. eta 5. ariketak (gelan zuzentzeko), baldintza hipotetikoa lantzekoak.

o   GPSa alboan, ibili munduan deritzon ulermen  jarduera.

o   Mendian ez galtzeko ikastaroa entzungaiaren atzeko aldea: berridazketak eta bete beharreko hutsuneak nominalizazioak erabiliz