31. eskola: 2025eko urtarrilaren 30ekoa
- Alegiazko NOR-NORI baldintza lantzeko berariaz prestatu
nien ariketa zuzendu dugu, astiro, beharrezko azalpenak emanez. Ohar bitez, nominalizazio bat tartean denean, nahiz
eta nominalizazio horrek berekin daraman objektua plurala izan, aditza
singularrean doala, nominalizazioak ekintza bakarra adierazten baitu:
Gure
amari entsaladarako tomateak (objektu plurala) erostea (nominalizazioa) ahaztuKO BALITZAIO,…(balitzaizkio)
Txokolatezko
bonboiak jatea gustatuKO BALITZAIT,…(balitzaizkit)
OHARRA: Norbaitek berriro egin nahi badu, ariketa hau H5P formatuan (interaktiboa) ere eskura dago blogean.
- Alegiazko adizkiekin jarraituz, gaurkoan, NOR-NORK
sistemari heldu diogu. Indikatiboko iraganeko adizkietatik abiatuta nola
sortzen diren gogorarazi diet. Horretarako, hainbat adibide egin ditugu
arbelean, eurek ikus zezaten Indikatiboko lehenaldiko adizkietatik baldintzako
adizkietara igarotzeko zer-nolako aldaketak egin behar dituzten (amaierako –(e)N kendu, BA- jarri eta 3. pertsonako Z > L. Bestalde, 1. pertsonako
adizkian amaieran –DA geratzen bada, -T bihurtu).
Halaber, ondorioko adizkietan –KE non sartu behar duten azaldu diet, oso nahasgarria baita. Eurei azalpen orriaren kopia bana eman diet. Jarraian, baldintzaren apunteetan dituzten taulei erreparatu diegu, adizki horien osaeraz ohar zitezen eta, bereziki, -KE non tartekatzen den ikus zezaten.
- “Ondo pentsatu urtarrileko aldapako beherapenetan erori aurretik” izeneko jarduera zuzendu dugu. Ariketa honetan, esaldiaren 1. zatia eta 2.a uztartu behar izan dituzte ikasleek.
- IKUS-ENTZUNAREN ULERMENA: Saltokiak jaiegunetan zabalik. Saltokiak jaiegunetan eta igandeetan zabaltzea soka
luzea dakarren (=hautsak arrotzen dituen = zeresana ematen duen)
auzia (=afera) da. Aste barruan (=astegunetan) ez ezik, igande eta jaiegunetan
ere saltokiak zabaldu egin behar ote lirateke? Afera (=eztabaida = auzi) hau ez
da gaur goizekoa; aitzitik, aspalditik dator. Telebistako saio honetan gai hau
dute eztabaidagai.
Saltokiak jaiegunetan zabaltzeari buruzko eztabaida gaitzat duen bideo-pasarte hau ikusi dugu birritan. Bertan, lau solaskide aritu dira kalakan. Ikasleek nik ipinitako hamairu adierazpenak solaskide horiekin uztartu behar izan dituzte, hots, adierazpen horiek kalakarietako zeinek esan dituen adierazi behar izan dute.
- Honen ondoren, binaka jarrita, horrezaz jardun dute hizketan. AHOZKO ADIERAZPENA: Saltokiak igande eta jaiegunetan zabalik? (35-40´).
- Etxerako lanak:
- Alegiazko
baldintza edo hipotetikoa. NOR-NORK sistemako ariketa analitikoak
(erantzunekin).
OHARRA: Norbaitek nahiago badu, ariketa hau H5P formatuan (interaktiboa) ere eskura dago blogean.
- Idatziaren ulermena, lexikoa eta zenbait egitura lantzeko, “Lacoste eta bere krokodilo famatua” jarduera.
- Sasoian sasoikoa deritzon jarduera, idatziaren ulermena lantzekoa.
- Iritzi artikulua: Igande eta jaiegunetan ere dendak zabalik? / Merkealdia…tentaldia?
- AUKERAKO JARDUERA: ENTZUNAREN
ULERMENA: Faktoria I (blogean entzungai). Itemak astiro irakurri eta birritan entzun
dezatela albistegia. Ondoren, zuzen dezatela erantzun orriarekin. Albistegi osoa batera entzun beharrean,
arloka entzun daiteke: osasun arloko albisteak lehenik; gero, ekonomia
arlokoak; geroago, trafikoari eta errepideei buruzkoak, eta, azkenik,
eguraldiaren iragarpena. Hori bai, atal bakoitza bi aldiz entzun dezatela,
azterketan bezala.
Bestalde, itemak irakurri ahala, oin-oharretako oharrei arretaz errepara diezaietela esan diet.
- Deklinabidea lantzeko ariketa. Osatu hutsuneak
deklinabide atzizki egokiak erabilita ( Getariako
arrantzaleek…). Lehenengo orrialdea egina ez badute, egin dezatela eta
egina baldin badute, zuzen dezatela gaurko ebazpen-orriekin. HURRENGO EGUNEAN ARGITUKO DITUGU ZALANTZAK.
OHARRA: Gogoan izan, norbaitek nahiago badu, ariketa hau H5P formatuan (interaktiboa) ere eskura dagoela blogean.
- NOREN vs.
NONGO deklinabide kasuak bereizteko
berariaz prestatutako ariketa. HURRENGO EGUNEAN ARGITUKO DITUGU ZALANTZAK.
OHARRA: Norbaitek nahiago badu, ariketa hau H5P formatuan (interaktiboa) ere eskura dago blogean.
- NOIZNAHI
EGITEKOA: Dendarik denda, merkeenen bila izeneko
cloze-testa; izan ere, garai honetan izan ohi da merkealdia. Ariketarekin
batera, zortzi orrialdeko txosten bat banatu diet, non, erantzun zuzenak
agertzeaz gain, horiei buruzko azalpenak zehatz-mehatz idatzi dizkiedan. Irakur dezatela arretaz, nahiz
eta erantzunak ongi eduki!!
OHARRA: Norbaitek
nahiago badu, ariketa hau H5P formatuan (interaktiboa) ere eskura dago blogean.
