Tarteko Mailako 40. eskola, martxoaren 18 eta 19koa

40.  eskola, martxoaren 18eta 19koa

-          Bizidunen deklinabidea : Gramatika eta ariketak I liburuko 197. orrialdeko 5. eta 6. ariketak zuzendu ditugu, astiro, beharrezko azalpenak emanez.

-          NOR-NORI-NORK iraganean. Esaldien beste erdiak ahoz egin ditugu, aldaketak eginez. Ikasleek ahoz adizki egokia txertatu behar izan dute egokitu zaien esaldian. Dena den, egin  ahala, aldaketak eskatu dizkiet: batzuetan nork, beste batzuetan nori, nor… aldarazi dizkiet eta, horrela, adizki gehiago praktikatu ditugu, erraztasuna lortze aldera eta adizki desberdinak bereganatze aldera.

-          ELKAR : Iñigo arraunlariak eta Mirenek elkar ezagutu zutenekoa zuzendu dugu. Oso ariketa egokia da. Errepara biezaiote aditzari, jakiteko ELKAR, ELKARRI…zer kasutan deklinatu.

-          Goizeko taldean, hirugarren entzunaldia egitearekin batera, Emakumearen nazioarteko eguna entzungaiarekin batera datorren ulermen jarduera zuzendu dugu.

-          Goizeko taldean : zaletasunekin jarraituz, “Xendazaletasuna edo mendi-ibiliak egitea: ibiltariaren dekalogoa”  ulermen jarduera zuzendu dugu. Luzetxo jo du, testuko hainbat hitz azaldu behar izan baititut. Aipamen berezia merezi izan dute honako esaldiok: “etxolen nahiz aterpeen ateak” eta “landareen nahiz fruituen bilketa”,  NAHIZ hori ez baita kontzesiboa. Lehenik ere agertuak zaizkigun arren, berriz gogorarazteak kalterik ez dielakoan egingo…

-          Hau azaltzeko, Gramatika eta ariketak liburuko 242. orrialdeko E puntua azaldu diet, hots, “nahiz” edo “zein” “eta”ren parekoak izan ohi direla eta perpausa baino osagai txikiagoak (sintagmak...) elkartzeko erabiltzen direla. Aukerakoa izaten dela bakarra erabili ala osagai bakoitzaren aurrean bana ipini, eta bi sintagmak deklina daitezkeela, edo nahi izanez gero, bigarrena bakarrik, lehenengoa mugagabean utzita. Hauen antzeko beste hainbat egitura arbeleratu ditugu.

o   Ana ETA Gloria berandu iritsi dira.

o    (NAHIZ) Ana NAHIZ Gloria berandu iritsi dira.

o   (ZEIN) Ana ZEIN Gloria berandu iritsi dira.

o   HALA Ana, NOLA Gloria berandu iritsi dira.

o   BAI Ana, BAI Gloria berandu iritsi dira.

o   Ana EZ EZIK, Gloria ERE berandu iritsi da (aditza B osagaiarekin komunztatua).

o   EZ BAKARRIK Ana, Gloria ERE berandu iritsi da (aditza B osagaiarekin komunztatua).

-          Arratsaldeko taldean, beste zaletasun bat: bizikletaz ibiltzea dela eta,  Bizikleta etorkizunerako garraiobidea ote?” izeneko cloze-testa zuzentzen aritu gara. Luzea da eta zuzenketak oso luze jo du, baina merezi  du, itemen artean, gauza asko agertzen baitira jada ikusiak, ikusten ari garenak edo gerora ikusiko ditugunak: lexikoa, nominalizazioak, ere, erlatibozkoak, NORK kasua, NORI kasua eskatzen duten hainbat aditz… Amaitzeke geratu zaigu.

-          AHOZKO ADIERAZPENA: Emakumeak, gizonen pare…ala…gizonen menpe?  Arratsaldeko taldean, emakume eta gizonezkoen arteko berdintasunaren gainean jardun dute (fitxako lehen lau puntuak); Goizeko taldean, berriz, genero indarkeriari buruz (fitxako bosgarren puntua). Horretarako, berariaz prestatutako mintza-fitxa banatu diet.

-          ETXERAKO LANAK:

-          Bizidunen deklinabidea : orrialde osagarria (erantzunak jada badituzte). Arratsaldekoek egin dezatela lehenengo ariketa – hutsuneak betetzekoa – gelan zuzenduko baitugu; goizekoek egin ditzatela biak – hutsuneak betetzekoa eta itzulpenak - , asteburua baitatorkia. Horretarako,  erantzun eta guzti eman dizkiet, nahi dutenean egin ditzaten eta eurek zuzen ditzaten.

o    Denok saltsan sartuta testua, areto-dantzei buruzkoa (hau ere beste zaletasun bat baita), mintzarako presta dezatela.

o   “Pilates, bururako eta gorputzerako onuragarri (mesedegarri)”. Irakur dezatela eta mintzarako presta dezatela.

o   Goizekoei, Extreme izeneko ulermen-jarduera, mendiko bizikletan ibiltzeko zaletasunari buruzkoa. Elkarrizketatik ateratako hainbat esaldi bertan txertatu behar dituzte, soberan dauden bi distraktoreak saihestuta.

o   Arratsaldekoei, sagardotegietara joateko zaletasunari buruzko ulermen jarduera : Sagardotegien xarma, testutik ateratako esaldiak bertan txerta ditzaten.

 

• Goizekoek ekar dezatela Bizikleta etorkizuneko garraiobidea ote ? eta, arratsaldekoek, berriz, Extreme,  hurrengoan zuzentzeko.